Putin Ermənistanla Azərbaycan arasında dəmir yolu əlaqəsinin bərpası ideyasını dəstəkləyib

Rusiya prezidenti Vladimir Putin Ermənistanla Azərbaycan arasında dəmir yolu əlaqəsinin bərpası ideyasını dəstəkləyib. Bu barədə Ermənistanın baş naziri Nikol Paşinyan bildirib: “Rusiya Federasiyasının prezidenti ilə dünənki danışıqların nəticəsi olaraq, biz dəmir yolunun bərpası üzrə işlərə razı ola bilərik. Söhbət Horadiz - Meğri - Ordubad - Sədərək - Yeraşx dəmir yolundan gedir. Amma əvvəlki acı təcrübəni nəzərə alsaq, bütün bunları hələ də təsdiqləmək və düzəltmək lazımdır”, - Paşinyan hökumətin iclasında bildirib.
Qeyd olunan yol Ermənistan və Azərbaycanın Naxçıvan Muxtar Respublikası ərazisindən İranla sərhəddə keçir. 1989-cu ildə Dağlıq Qarabağda münaqişənin başlaması ilə bu barədə kommunikasiya kəsilib.
Rusiya Federasiyası Prezidentinin mətbuat katibi Dmitri Peskov Bakı ilə Yerevan arasında sülh müqaviləsinin imzalanmasının vacibliyini qeyd edib. Onun sözlərinə görə, Rusiya bunun üçün öz səylərini göstərir.
Peskov həmçinin bildirib ki, Bakı ilə İrəvan arasında münaqişənin həllində KTMT-nin səyləri tələb olunur. Peskov  KTMT-nin fəaliyyətini fiasko kimi qiymətləndirən Ermənistanın baş nazirinin sözlərinə münasibət bildirib ki: bu, yalnız erməni tərəfinin fikridir.