"Futbolumuz yenidən aşsüzən dövrünə qayıtdı" - Deputat

"Futbolumuz yenidən aşsüzən dövrünə qayıtdı. Yalandan Byazinin boynuna yıxmayın. Milli komandada oynamanın məsuliyyətini futbolçu anlamırsa, fədakarlıq etmirsə, hansı məşqçini gətirsəniz, belə davam edəcək".
Bunu deputat Fazil Mustafa deyib. O bildirib ki, Azərbaycanda böyük mənada futbol yoxdursa, milliyə oyunçu götürmə alternativləri hədsiz məhdud olacaq:
"Qurban Qurbanovu intriqalara qurban verərək uzaqlaşmağa məcbur etdilər ki, millimiz həmişə bu cür sınıq-salxaq durumda qalsın. Komandanın liderinin olmaması ilə yanaşı həm də xarakteri yoxdur. Bərabər səviyyədə 70-ci dəqiqəyədək davam edən oyunda son 30 dəqiqədə tam bir acizlik mənzərəsi ortaya qoyuldu. Udub-uduzmaq önəmli deyil, bütün hallarda əzmkarlıq göstərmək lazımdır. Əvəzində tam doqquzluğa vurdular. Bəs nə etməli? Gürcüstan və Ermənistan millilərinin oyunlarını diqqətlə izləyib, ən azı aşsüzən olmamanın yolunu tapmaq yaxşı olardı", - deyə F.Mustafa qeyd edib.
Qeyd edək ki, Azərbaycanın futbol üzrə yığma komandası ötən gün İsveç millisinə 5:0 hesabı ilə məğlub olub.