İş adamının 75 mənzili, 42 avtomobili müsadirə olunacaq

Ermənistanda iş adamı və siyasətçi Qaqik Tsarukyana məxsus "Araratsement" zavodu dövlətin idarəçiliyinə və mühafizəsinə verilib.

protest.az Ermənistan KİV-nə istinadən xəbər verir ki, Baş Prokurorluğun bununla bağlı vəsatəti məhkəmə tərəfindən təmin olunub.

Məlumata görə, dövlət qurumları Tsarukyandan böyük həcmdə əmlak və vəsaitin müsadirə edilməsini tələb edir.

İddia çərçivəsində ondan:

- 75 daşınmaz əmlak obyekti və daha 10 obyektin bazar dəyərinin;
- 42 nəqliyyat vasitəsinin
- 38 şirkətdəki paylarının, o cümlədən "Multi Group" konserni, "Multi Avtotrans" MMC, "Onira Club" MMC və digər hüquqi şəxslərdəki iştirak paylarının;
- qanunsuz gəlir qalığı və verilmiş borclar daxil olmaqla 105 milyard dramdan (təxminən 284 milyon ABŞ dolları) çox vəsaitin dövlətə keçirilməsi tələb olunur.

Bildirilir ki, müsadirəsi istənilən 75 daşınmaz əmlakdan 57-si İrəvanda yerləşir.

Qeyd edək ki, daha əvvəl Ermənistanın Baş naziri Nikol Paşinyan Qaqik Tsarukyanın biznesinə qarşı sərt açıqlamalar vermişdi. O, Tsarukyanın "biznes onurğasını qıracağını", əmlaklarını, o cümlədən "Araratsement"i əlindən alacağını və onun evini qocalara xidmət mərkəzinə çevirəcəyini bildirmişdi.
Xəbər lenti
Çox oxunanlar